GB News

وفاقی حکومت دس ملین سونامی مہم میں گلگت بلتستان کو سوفیصد فنڈنگ کرے گی، ملک امین اسلم خان

Share Button

سکردو (پ ر) وزیر اعظم کے مشیر برائے ماحولیاتی تبدیلی ملک امین اسلم خان نے ماحولیاتی تبدیلی کے باعث پیدا ہونے والے تبدیلیوں سے نمٹنے کے لیئے محکمہ جنگلات ، گلگت بلتستان کی جانب سے کی جانے والی کوششوں کو سراہتے ہوئے وفاقی حکومت کی جانب سے مکمل تعاون کی یقین دہانی کروائی ہے ، وہ جمعہ کوایک روزہ دورے پر سکردو پہنچے جہاں انہوں نے حسین آباد، حوطو، اور سدپارہ فارسٹ پلانٹیشن کا دورہ کیا جہاں محکمہ جنگلات کی جانب سے اس سیزن میں ایک لاکھ سے زائد درخت لگائے گئے ہیں۔ انہوں نے سدپارہ حسین آباد میں درخت بھی لگایا۔ وزیر اعظم کے مشیر برائے ماحولیاتی تبدیلی ملک امین اسلم خان نے سرفہ رنگا ہ ایونیو پلانٹیشن کا بھی خصوصی دورہ کیا اور وہاں پر صحرا میں لگائے گئے ہزاروں کی تعداد میں درخت دیکھ کر خوشگوار حیرت کا اظہار کرتے ہوئے ایک معجزہ قرار دیا۔ انہوں نے بلتستان ڈویژن کے ضلع شگر کا بھی دورہ کیا اور مختلف پلانٹیشن کا بھی دورہ کیا۔ اس موقع پر انہوں نے محکمہ جنگلات گلگت بلتستان کی لگن کو سراہا ۔ انہوں نے کہا کہ وفاقی حکومت دس ملین سونامی مہم میں گلگت بلتستان کو سوفیصد فنڈنگ کرے گی، کیونکہ گلگت بلتستان میں پانی کے وسیع ذخائر موجود ہیں اور وفاقی حکومت اپنی ذمہ داری سمجھتی ہے کہ ان کی حفاظت کی جائے ۔ سات ارب روپے کی لاگت سے گلگت بلتستان میں 170ملین پودے لگائے جائیں گے۔ اس کی ادائیگی جلد یقینی بنائی جائے گی۔ یاد رہے کہ وزیر اعظم کے مشیر برائے ماحولیاتی تبدیلی ملک امین اسلم خان آج گلگت سکوار ڈگری کالج میں پودہ لگا کر پلانٹ فار جی بی مہم کا باقاعدہ افتتاح کریں گے اور اگلے روز ہنزہ میں پلاسٹک بیگ پر پابندی مہم کا باقائدہ افتتاح کریں گے۔

Facebook Comments
Share Button