تازہ ترین

GB News

فضل الرحمن مدارس اصلاحات سے پریشان، اپنی ڈوبتی سیاست بچا رہے ہیں،عمران خان

Share Button

وزیراعظم عمران خان نے کہاہے کہ مولانا فضل الرحمان مدارس اصلاحات پر پریشان ہیں، اصلاحات ہوگئیں تو مدارس کے طلبہ کو سیاسی مقاصد کیلئے استعمال نہیں کیا جاسکے گا، مولانا اپنی ڈوبتی ہوئی سیاست بچانے کی کوشش میں ہیں، احتساب کے معاملے میں کوئی سمجھوتہ نہیں ہوگا، حکومت عوام کے جان و مال کی حفاظت کی ذمہ داری پوری کرے گی۔جمعہ کو وزیراعظم عمران خان کی زیر صدارت حکومتی اور پارٹی ترجمانوں کا اعلیٰ سطح کا اجلاس ہوا جس میں ملک کی معاشی و سیاسی صورتحال پر غور کیا گیا۔ ذرائع کے مطابق اجلاس میں وزیراعظم عمران خان کے دورہ چین، چائنا پاکستان اقتصادی راہداری (سی پیک) منصوبوں پر پیشرفت پر بات چیت کی گئی۔ نجی ٹی وی کے مطابق اجلاس میں مولانا فضل الرحمان کی طرف سے آزادی مارچ کے اعلان پر بھی گفتگو ہوئی، اس موقع پر وزیراعظم عمران خان نے کہا کہ مولانا فضل الرحمان اپنی ڈوبتی سیاست بچا رہے ہیں، مولانا فضل الرحمان مدارس اصلاحات پر پریشان ہیں، اصلاحات ہو گئیں تو مدارس کے طلبا کو سیاسی مقاصد کیلئے استعمال نہیں کیا جا سکے گا،احتساب کے معاملے میں کوئی سمجھوتہ نہیں ہوگا، حکومت عوام کے جان و مال کی حفاظت کی ذمہ داری پوری کرے گی۔اجلاس میں مشیر خزانہ عبدالحفیظ شیخ نے ملک کی موجودہ معاشی صورتحال پراجلاس کو بریفنگ دی۔ شرکا نے رائے دی کہ مولانا فضل الرحمان شوق سے اسلام آباد آئیں، امید ہے مولانا فضل الرحمان 27 اکتوبر کی تاریخ نہیں بدلیں گے۔ دوسری جانب وزیراعظم عمران خان نے کہا ہے کہ پاکستان سٹیل کی بحالی حکومت کی ترجیحات میں شامل ہیں ،سرکاری خزانے پر بوجھ بننے والے ادارے کی بحالی ضروری ہے، اس حوالے سے گزشتہ حکومتوں کا معاملہ فراموش کرنا قوم پر ظلم کے مترادف ہے، جمعہ کو وزیراعظم عمران خان کی زیر صدارت اجلاس ہوا، جس میں مشیر تجارت عبدالرزاق داﺅد، وفاقی وزیر نجکاری محمد محمد سومرو، چیئرمین بورڈ آف ڈائریکٹرز پاکستان سٹیل عامر ممتاز سمیت دیگر افسران نے شرکت کی۔ وزیراعظم کی زیر صدارت اجلاس میں پاکستان اسٹیل کی بحالی سے متعلق اقدامات اور تجاویز پر غور کیا گیا۔ اجلاس میں وزیراعظم کو بریفنگ دی گئی کہ پاکستان سٹیل کی بحالی کےلئے چین اور روسی کمپنیوں نے دلچسپی لی ہے جبکہ اس سے متعلق مختلف تجاویز پر غور کیا جا رہا ہے۔وزیراعظم نے کہا کہ موجودہ حکومت پاکستان سٹیل کو بحال کر کے منافع بخش ادارہ بنانا چاہتی ہے۔

Facebook Comments
Share Button