تازہ ترین

GB News

پبلک پرائیویٹ پارٹنر شپ کے تحت منصوبوں کے انتہائی مثبت نتائج سامنے آئے ہیں،وزیر اعلیٰ

Share Button

گلگت (پ ر)وزیر اعلیٰ گلگت بلتستان حافظ حفیظ الرحمن نے کہا ہے کہ ماضی میں محکمہ بلدیات کی سکیمیں صرف کاغذوں کی حدتک ہوتی تھیں۔ آج مختلف علاقوں میں پبلک پرائیویٹ پارٹنر شپ کے تحت منصوبے تعمیر کئے گئے ہیں جو عوام کے سامنے ہیں۔ محکمہ بلدیات کو درکار وسائل فراہم کئے گئے ہیں جس کی وجہ سے ادارے کی کارکردگی میں واضع بہتری آئی ہے اور ادارے کی کارکردگی مثالی بن گئی ہے۔ وزیر اعلیٰ گلگت بلتستان حافظ حفیظ الرحمن نے کہا ہے کہ اداروں میں اصلاحات متعارف کروائے جس کی وجہ سے تمام اداروں کی کارکردگی قابل تحسین ہے۔ پہلے دن سے گلگت بلتستان کی تعمیر و ترقی کیلئے مخلصانہ اقدامات کئے ہیں۔ اقتدار کو آزمائش کے طور پر لیا ہے۔ ہمارے سیاسی مخالفین کی خواہش تھی کہ گلگت بلتستان میں ترقیاتی کام نہ ہو لیکن ہم نے بلاتفریق تمام علاقوں میں میگا منصوبے تعمیر کئے۔ ان خیالات کا اظہار وزیر اعلیٰ گلگت بلتستان حافظ حفیظ الرحمن نے محکمہ بلدیات کے تحت جاری منصوبوں کے حوالے سے منعقدہ اعلیٰ سطحی اجلاس سے خطاب کرتے ہوئے کیا۔ وزیر اعلیٰ گلگت بلتستان حافظ حفیظ الرحمن نے کہا کہ محکمہ بلدیات کے تحت نئے منصوبوں کو ٹارگٹڈ کیا جائے اور منصوبوں کی نگرانی کی جائے۔ معیار اور رفتار پر کوئی سمجھوتہ نہیں کیا جائے۔ پبلک پرائیویٹ پارٹنر شپ کے تحت منصوبوں کے انتہائی مثبت نتائج سامنے آئے ہیں۔ ان منصوبوں میں کمیونٹی کی موبلائزیشن کو یقینی بنایا جائے تاکہ ترقیاتی منصوبوں میں عوام کی شراکت داری ہوسکے۔ وزیر اعلیٰ گلگت بلتستان حافظ حفیظ الرحمن نے سالڈ ویسٹ مینجمنٹ کمپنی کی کارکردگی کو سراہتے ہوئے ہدایت کی ہے کہ سنیٹری ورکرز کو دوران ڈیوٹی حفاظتی کٹ کے استعمال کو یقینی بنایا جائے۔ ویسٹ مینجمنٹ کمپنی کی کارکردگی کو مزید بہتر بنانے کیلئے جدید مشینری کی خریداری کی جائے۔ وزیر اعلیٰ گلگت بلتستان حافظ حفیظ الرحمن نے کہا کہ حکومتی اصلاحات کی وجہ سے گلگت بلتستان کا ترقیاتی بجٹ معاشی اصولوں کے مطابق 100 فیصد استعمال ہورہاہے۔ وزیر اعلیٰ گلگت بلتستان حافظ حفیظ الرحمن نے اس موقع پر گلگت کے جن مقامات پر ویسٹ مینجمنٹ کی سوزوکیاں نہیں پہنچ سکتیں وہاں فوری طور پر چنگ چی رکشہ سروس کے ذریعے کچرے کو جمع کرنے کے احکامات جاری کردیئے۔

Facebook Comments
Share Button