بھارت میں پاکستانی سیلیبرٹیز کے سوشل میڈیا اکاﺅنٹس ایک بار پھر بند

لاہور (آئی این پی) بھارت اور پاکستان کے درمیان کشیدگی کے تناظر میں پاکستانی فنکاروں کے سوشل میڈیا اکاﺅنٹس ایک بار پھر بھارتی صارفین کے لیے بلاک کر دیے گئے ۔ 2جولائی کو، صبا قمر، ماورا حسین، فواد خان، شاہد آفریدی، احد رضا میر، یمنہ زیدی اور دانش تیمور سمیت کئی دیگر فنکاروں کے انسٹاگرام اکاﺅنٹس اور ٹی وی چینلز کے یوٹیوب چینلز بھارت میں کھلنے لگے تھے، جس پر مداحوں نے خوشی کا اظہار کیا اور قیاس آرائیاں شروع ہو گئیں کہ شاید سوشل میڈیا پر عائد پابندیاں خاموشی سے ختم کر دی گئی ہیں۔تاہم جمعرات کو ایک بار پھر صورتحال بدل گئی اور جب بھارتی صارفین نے ان فنکاروں کے پروفائلز کھولنے کی کوشش کی، تو ایک پیغام ظاہر ہوا، اکاﺅنٹ بھارت میں دستیاب نہیں۔ یہ کارروائی قانونی درخواست پر کی گئی ہے۔ابھی تک بھارتی حکومت یا وزارت اطلاعات و نشریات کی جانب سے اس صورتحال پر کوئی باضابطہ بیان جاری نہیں کیا گیا ہے۔