امریکا کے ساتھ تجارت اور سرمایہ کاری بڑھانا چاہتے ہیں،وزیر خزانہ

وفاقی وزیر خزانہ سینیٹر محمد اورنگزیب نے کہا ہے کہ پاکستان اور امریکا کے درمیان ابھی کچھ امور پر بات چیت ہونا باقی ہے، امریکا کے ساتھ تجارت اور سرمایہ کاری کو بڑھانا چاہتے ہیں،امید ہے کہ تجارتی مذاکرات تعمیری انداز میں آگے بڑھیں گے۔امریکہ وزیر تجارت ہاورڈ لٹنک اور امریکی تجارتی نمائندے جیمیسن گریئر سے ملاقاتوں کے بعد گفتگوکرتے ہوئے وزیر خزانہ کا کہناتھا کہ پاکستان اور امریکا کے درمیان تجارتی تعلقات پر گفتگو کی گئی، حالیہ چند ماہ سے جاری دو طرفہ تجارتی مذاکرات کا احاطہ کیا گیا، امید ہے کہ تجارتی مذاکرات تعمیری انداز میں آگے بڑھیں گے جو دونوں معیشتوں کے لیے فائدہ مند ثابت ہوں گے۔وزیر خزانہ نے کہا کہ بہت جلد دونوں ممالک کی قیادت تجارتی معاہدے کا اعلان کرے گی، امریکا پاکستان کا سب سے بڑا تجارتی شراکت دار ہے، امریکا کے ساتھ تجارت اور سرمایہ کاری کو بڑھانا چاہتے ہیں۔انہوں نے کہا کہ امریکا کے ساتھ سرمایہ کاری کے شعبوں میں تعاون کو بڑھایا جا رہا ہے، پاکستان روایتی و غیر روایتی شعبوں جیسے آئی ٹی، ٹیکنالوجی، معدنیات اور زراعت میں تعاون کا خواہاں ہے۔ ملاقات میں باہمی مفادات کے تمام ممکنہ شعبوں میں شراکت داری کو بڑھانے پر اتفاق کیا۔