نشو نے ریمبو کو بیٹی کے ساتھ تعلقات میں کشیدگی کی وجہ قرار دے دیا

 پاکستانی فلم انڈسٹری کی ماضی کی معروف اداکارہ نشو جی نے اپنی بیٹی، اداکارہ صاحبہ کے ساتھ پیچیدہ تعلقات کی وجوہات بیان کر دی ہیں۔ نشو نے بیٹی سے تعلقات میں کشیدگی پر وضاحت دیتے ہوئے ایک انٹرویو میں کہا ہے کہ وہ ایک باعزت اور صاف گو انسان ہیں اور کسی سے معافی مانگنے کا سوال ہی پیدا نہیں ہوتا کیونکہ غلطی ان کی نہیں بلکہ دوسروں کی ہے۔ ان کا کہنا تھا کہ اگر صاحبہ اور ان کے شوہر ان سے دور رہ کر خوش ہیں، تو انہیں اس پر اعتراض نہیں۔ انہوں نے مزید کہا کہ ان کے بیان میں ایک پوشیدہ پیغام ہے، جس میں وہ چاہتی ہیں کہ اگر ان کے دور رہنے سے صاحبہ کا گھر بچتا ہے، تو یہی بہتر ہے۔ نشو جی نے اس بات پر بھی افسوس کا اظہار کیا کہ صاحبہ اور ان کے شوہر نے نجی معاملات کو عوام کے سامنے لے جانے کی غلطی کی۔ ان کے مطابق عزت دار اور خاندان پرست لوگ ذاتی مسائل کو سوشل میڈیا پر زیر بحث نہیں لاتے۔ سینئر اداکارہ کا کہنا تھا کہ صاحبہ کو یوٹیوب پر ویڈیوز کے ذریعے گھر کا یہ مسئلہ اجاگر نہیں کرنا چاہیے تھا۔