ڈیجیٹل میڈیا پاکستان اور چین کے درمیان نئی راہداری ہے،عطا تارڑ

بیجنگ(آئی این پی )وفاقی وزیر اطلاعات عطا تارڑ نے کہا ہے کہ ڈیجیٹل میڈیا پاکستان اور چین کے درمیان نئی راہداری ہے، ہم ایک ایسے پرامن مستقبل کے خواہاں ہیں جہاں پانی کو ہتھیار کی بجائے امن کا ذریعہ بنایا جائے ۔چین میں ثقافتی وراثت اور جدت کے موضوع پر فورم سے خطاب کرتے ہوئے وفاقی وزیر عطا تارڑ کا کہنا تھا کہ چین کو ہم ہمیشہ اپنا آہنی بھائی کہتے آئے ہیں، ہماری سرحدیں، پہاڑ اور دریا بھی ایک دوسرے سے جڑے ہیں، پاکستان وادی سندھ کی عظیم تہذیب کا وارث ہے، اس تہذیب کا آغاز چین سے ہوتا ہے۔انہوں نے کہا کہ قدیم شاہراہ ریشم آج پاک چین اقتصادی راہداری کی شکل اختیار کر چکی ہے، یہ شاہراہ صرف تجارت کا ذریعہ نہیں بلکہ دوستی کا راستہ ہے، سی پیک تہذیبوں کو جوڑنے کا راستہ ہے، پاکستان ایک ایسی قوم ہے جو تہذیبوں کے سنگم پر واقع ہے۔ان کا کہنا تھا کہ یہ تہذیبیں صوفی شاعری اور ہنر ہمارے نوجوانوں کے خیالات میں زندہ ہیں، نوجوان نسل اس ورثے کی نئی تعمیر کر رہی ہے، اس لئے نئی نسل کو موقع دینا ہوگا کہ وہ نئی سوچ، نئے انداز اور نیا تناظر فراہم کرے، پاکستان اور چین کی شراکت داری صرف حکومتی سطح تک محدود نہیں۔عطا تارڑ نے کہا کہ ہم نے پاکستان اور چین کے مابین ریاستی سطح پر نشریاتی اداروں کے درمیان تعاون کو فروغ دیا، اب ہم مشترکہ ڈاکومنٹریز اور فلم سازی کے میدان میں بھی آگے بڑھ رہے ہیں۔ان کا کہنا تھا کہ مستقبل اب ڈیجیٹل روابط میں ہے، ڈیجیٹل میڈیا ہماری نئی راہداری ہے، ایسی راہداری جو ثقافت، دوستی اور ترقی کو آپس میں جوڑتی ہے، ہم نے اپنے ورثے کو ڈیجیٹائز کرنے کا عمل شروع کیا ہے۔وفاقی وزیر اطلاعات نے مزید کہا کہ ہم ایک ایسے پرامن مستقبل کے خواہاں ہیں جہاں پانی کو ہتھیار کی بجائے امن کا ذریعہ بنایا جائے۔