اسلام آباد(آئی این پی )سپیکر قومی اسمبلی ایاز صادق نے کہا کہ ملکی سلامتی کے تحفظ کے لئے سکیورٹی فورسز کی جراتمندانہ کارروائیوں پر فخر ہے۔سپیکر قومی اسمبلی سردار ایاز صادق نے بلوچستان کے علاقے ژوب میں بھارتی سپانسرڈ دہشت گردوں کی دراندازی کی کوشش کو ناکام بنانے پر سکیورٹی فورسز کو خراج تحسین پیش کیا ہے، انہوں نے 33 بھارتی سپانسرڈ دہشت گردوں کو ہلاک کرنے پر سکیورٹی فورسز کی ستائش کی اور ان کی جرات و بہادری کی تعریف کی۔سردار ایاز صادق نے کہا کہ پاکستان کے دشمنوں کو ان کے مذموم عزائم میں کبھی کامیابی نہیں ملے گی، پوری قوم افواج پاکستان اور قانون نافذ کرنے والے اداروں کے شانہ بشانہ کھڑی ہے، دہشت گردی کے مکمل خاتمے تک جنگ جاری رہے گی۔سپیکر قومی اسمبلی نے کہا کہ پاکستان کی سر زمین پر دہشت گردی اور بھارتی مداخلت کسی صورت برداشت نہیں کی جائے گی، انہوں نے کہا کہ بلوچستان کے امن کو سبوتاژ کرنے کے ناپاک عزائم کو قومی یکجہتی کے ساتھ خاک میں ملایا جائے گا۔انہوں نے مزید کہا کہ دہشت گردی کے خلاف جنگ میں سکیورٹی فورسز کی مزید کامیابیوں کے لئے دعا گو ہوں۔
ملکی سلامتی کے تحفظ کیلئے سکیورٹی فورسز کی جراتمندانہ کارروائیوں پر فخر ہے،ایاز صادق
