پی ٹی آئی کے 5 اگست کو احتجاج کی کال پر اختلافات، عالیہ حمزہ کی عہدہ چھوڑنے کی دھمکی

لاہور(آئی این پی )پی ٹی آئی کی 5 اگست کو احتجاج کی کال پرمرکزی اور پنجاب قیادت میں اختلافات سامنے آگئے، پنجاب کی چیف آرگنائزر نے 5 اگست کو احتجاج نہ کرنے پر عہدہ چھوڑنے کی دھمکی دے دی۔ رپورٹ کے مطابق پی ٹی آئی کے عبوری چیئرمین بیرسٹر گوہر، وزیراعلی خیبرپختونخوا علی امین گنڈاپور سمیت دیگر مرکزی رہنما 90 دن میں فائنل احتجاج کی کال پر قائم ہیں، پنجاب کی چیف آرگنائزر عالیہ حمزہ 5 اگست کو فائنل کال کے مقف پر ڈٹ گئی ہیں۔اس سے قبل قیاس آرائیاں کی جارہی تھیں کہ پاکستان تحریک انصاف 5 اگست کو اپنے بانی عمران خان کی گرفتاری کے 2 سال مکمل ہونے پر ملک گیر احتجاج کا اعلان کرے گی۔ذرائع کا کہنا ہے کہ پی ٹی آئی کی مرکزی اور پنجاب کی قیادت اپنے اپنے موقف کے ساتھ آمنے سامنے آگئی ہیں، پی ٹی آئی پنجاب کی چیف آرگنائزر عالیہ حمزہ کا کہنا ہے کہ پارٹی کو 5 اگست کے احتجاج پر قائم رہنا چاہیے، پنجاب میں وہ 5 اگست کو احتجاج کی کال دے سکتی ہیں۔ذرائع کا کہنا ہے کہ عالیہ حمزہ نے پنجاب کی تنظیم اور عہدیداروں کو 5 اگست کے احتجاج کی تیاریوں کی ہدایت بھی کر دی ہے۔دوسری جانب بیرسٹر گوہر، علی امین گنڈاپور سمیت دیگر رہنما 90 دن میں فائنل کال کا موقف اپنائے ہوئے ہیں، تاہم پنجاب کی چیف آرگنائزر نے احتجاج نہ کرنے پر عہدہ چھوڑنےکی دھمکی دے دی ہے۔مرکزی قیادت نے مقامی عہدیداروں کی خواہش کےمطابق احتجاج میں شرکت کی یقین دہانی کروائی ہے۔