اسرائیل کو تسلیم کرنے کا سوال ہی پیدا نہیں ہوتا،راناثنااللہ

اسلام (آئی این پی )وزیراعظم کے مشیر برائے سیاسی امور راناثنااللہ نے دوٹوک الفاظ میں کہا ہے کہ اسرائیل کو تسلیم کرنے کا سوال ہی پیدا نہیں ہوتا، فلسطین کا جو موقف ہے عالم اسلام کو ان کیساتھ کھڑا ہونا چاہیے۔ایک انٹرویو میں راناثنااللہ نے کہا کہ فلسطینیوں پر جو ظلم ہو رہا ہے اس کی معلوم تاریخ میں مثال نہیں ملتی اگر کسی پر اتنا ظلم ہوا بھی ہے تو فلسطینیوں کی طرح مزاحمت نظر نہیں آئی۔راناثنااللہ نے کہا کہ دنیا نے صرف بیانات کے علاوہ فلسطینیوں کیلئے کیا کچھ کیا ہے؟ پاکستان کو فلسطینیوں کے موقف کیساتھ کھڑا ہونا چاہیے فلسطینی جو بھی موقف اختیار کریں ہمیں ان کی بھرپور حمایت کرنی چاہیے، فلسطینی قوم ظلم کا بہادری سے مقابلہ کر رہی ہے اسلامی دنیا کو اپنے موقف کو فلسطین کے پلڑے میں ڈالنا چاہیے۔انہوں نے واضح کہا کہ حکومت کا یہی فیصلہ ہے خیبرپختونخوا حکومت کو نہیں گرایا جائے گا اب تک یہی فیصلہ ہے کہ کے پی میں گورنر راج یا عدم اعتماد نہیں لائی جائےگی۔ان کا کہنا تھا کہ پی ٹی آئی سسٹم میں رہ کر جدوجہد اور اپنے موقف کی کوشش کرے، برے وقت تمام پارٹیوں پر آتے ہیں پی پی اور ن لیگ پر بھی آیا تھا، ن لیگ اور پیپلزپارٹی نے سسٹم میں رہ کر جدوجہد کی ہے اگر پی ٹی آئی سسٹم سے نکل کر جدوجہد کرنا چاہتی ہے تو باقاعدہ اعلان کرے