پیپلزپارٹی بجٹ سے پہلے کینالز منصوبہ مسترد کروائے گی، وزیراعلی سندھ

حیدر آباد(آئی این پی )وزیر اعلی سندھ مراد علی شاہ نے کہا ہے کہ ہمارے ہوتے ہوئے سندھ کے خلاف کوئی بھی سازش نہیں کرسکتا، پیپلزپارٹی بجٹ سے پہلے کینالز کا منصوبہ مسترد کروائے گی۔ بھان سعید آباد میں میڈیا سے گفتگو کرتے ہوئے انہوں نے کہا کہ میں نے خود کینالز کے معاملے پر سروے کروایا جو کام ہوا تھا وہ اب بند ہو چکا ہے، چیئرمین پیپلز پارٹی بلاول بھٹو زرداری نے وزیراعظم شہباز شریف سے کہہ دیا ہے کہ کینالز کے معاملے پر عوام کے ساتھ ہیں، سوشل میڈیا پر تاثر دیا گیا کہ سندھ کے عوام پیپلز پارٹی سے ناراض ہیں لیکن عمرکوٹ والوں نے سازشی عناصر کو واضح پیغام دیا کہ عوام ہمارے کے ساتھ ہیں، کینالز کے خلاف 25 اپریل کو سکھر میں جلسہ ہوگا۔ مراد علی شاہ نے کہا کہ مسلم لیگ ن کے لوگوں نے کینالز کے بارے میں غلط بیانی کی اور بعد میں اس پر معافی بھی مانگی، احتجاج کرنا پورے سندھ کا حق ہے کسی کو نہیں روکا، گزشتہ روز کے جلسے میں تمام جماعتوں کو شرکت کرنی چاہیئے تھی، بطور وزیر اعلی سندھ میں نے وفاق کے سامنے بھرپور مورقف رکھا ہے، ہم کینالز کے خلاف مشترکہ مفادات کونسل میں گئے جہاں ہمارے احتجاج کے بعد ایکنک اجلاس سے کینالز کا ایجنڈا نکالا گیا