مذہبی رواداری اور باہمی احترام کا فروغ ہمارا عزم ہے، مریم نواز

لاہور(آئی این پی )وزیر اعلی مریم نواز شریف نے کہا ہے کہ ہر سطح پر مذہبی رواداری اور باہمی احترام کا فروغ ہمارا عزم ہے۔عقیدے اور مذہب کی بنیاد پر تشدد اور نفرت کا نشانہ بننے والے افراد کے عالمی دن پر اپنے پیغام میں وزیراعلی پنجاب مریم نواز کا کہنا تھا کہ ہماری ہمدردی مذہب تعصب کی بنا پر ظلم سہنے والے مظلوموں کے ساتھ ہے، اسلاموفوبیا دنیا بھر میں ایک کڑوی اور تلخ حقیقت ہے۔انہوں نے کہا کہ مساجد پر حملے، حجاب پہننے والی خواتین پر پابندیاں اور مسلمانوں کو دہشت گردی سے جوڑنے کی روش انسانیت کیلئے نشان ہے، فلسطین کی زمین خونِ شہدا سے سرخ ہے، معصوم بچوں کی آہیں گولیوں کی گھن گرج میں دفن ہو رہی ہیں۔ان کا کہنا تھا کہ کشمیر کی وادیاں آج بھی صدیوں پرانے دکھوں سے لہو لہان ہیں، کشمیر اور غزہ انسانیت کے ضمیر پر سوال ہیں جن کا جواب عالمی برادری ابھی تک دینے سے قاصر ہے، ہمیشہ ہر اس مظلوم کے ساتھ کھڑے ہیں جو مذہبی بنیادوں پر ظلم و زیادتی کا شکار ہو رہے ہیں۔مریم نواز نے مزید کہا کہ دین اسلام محبت امن اور رواداری کا درس دیتا ہے، ہر مظلوم کے ساتھ ہیں اور رہیں گے، ہر سطح پر مذہبی رواداری اور باہمی احترام کا فروغ ہمارا عزم ہے۔