بھارت کے دریاﺅں میں پانی چھوڑنے پر صورتحال زیادہ خراب ہوئی،عظمی بخاری

لاہور(آئی این پی )وزیر اطلاعات پنجاب عظمی بخاری نے کہا ہے کہ بھارت کے دریاﺅں میں پانی چھوڑنے پر صورتحال زیادہ خراب ہوئی، سیلابی صورتحال سے نمٹنے کیلئے پیشگی اقدامات کر لئے گئے ہیں، پنجاب میں سیلاب سے کوئی جانی نقصان نہیں ہوا، سیلاب میں پھنسے لوگوں کو ریسکیو کیا گیا ہے، جنہیں جرمنی جاپان کی سرحد کا نہیں پتا، انہیں مریم نواز کے دورہ جاپان سے تکلیف ہوئی۔ان خیالات کااظہار انہوں نے لاہور میں صحافیوں سے گفتگو کرتے ہوئے کیا۔ عظمی بخاری کا کہنا تھا کہ پنجاب میں ریکارڈ بارشوں کے باعث 30 سالہ بارشوں کا ریکارڈ ٹوٹ گیا ہے اور مختلف اضلاع میں سیلابی صورتحال پیدا ہوئی ہے، صرف سیالکوٹ میں 405 ملی میٹر بارش ریکارڈ ہوئی ہے جس سے شہر مکمل طور پر پانی میں ڈوب گیا تھا تاہم چند گھنٹوں میں نکاسی کا عمل مکمل کر لیا گیا۔انہوں نے کہا کہ قصور، اوکاڑہ اور پاکپتن سمیت کئی اضلاع متاثر ہوئے ہیں، دریائے ستلج میں اونچے درجے کا سیلاب ہے جبکہ دریائے راوی میں 38 برس بعد سیلاب آیا ہے، سیلاب سے 45 ہزار افراد متاثرہ ہوئے، 14 ہزار سے زائد افراد کو محفوظ مقامات پر منتقل کر دیا گیا ہے اور تمام ادارے امدادی سرگرمیوں میں مصروف ہیں۔ان کا کہنا تھا کہ بھارت کی جانب سے اچانک پانی چھوڑنے کے بعد حکومت نے فوری فلڈ الرٹ جاری کیا اور فوج کو انتظامیہ کی مدد کیلئے طلب کر لیا گیا، خوش آئند امر یہ ہے کہ پنجاب میں تاحال کوئی جانی نقصان رپورٹ نہیں ہوا۔عظمی بخاری نے وزیر اعلی مریم نواز نے جاپان سے واپسی پر جہاز میں سیلاب پر میٹنگ کی جبکہ وہ سیلابی صورتحال پر مختلف میٹنگ کر رہی ہیں۔صوبائی وزیر نے کہا کہ وزیر اعلی پنجاب مریم نواز صورتِ حال پر مسلسل نظر رکھے ہوئے ہیں اور تمام افسران کو فیلڈ میں رہنے کی ہدایت دی گئی ہے، یہ قدرتی آفات ہیں اور امید ہے اللہ خیر کرے گا۔صوبائی وزیر نے کہا کہ لوگوں کو وزیراعلی مریم نواز کے دورہ جاپان سے تکلیف ہوئی، ایسے لوگ قابل ترس ہیں، یہ کارکردگی میں مقابلہ نہیں کر سکتے صرف تنقید کرتے ہیں۔جاپان میں وزیر اعلی نے زراعت کے حوالے سے مختلف ایم او یو پر دستخط کیے ہیں، مریم نواز جاپانی حکومت کی دعوت پر گئی تھیں جہاں انہوں نے کمپنیوں کو پاکستان میں سرمایہ کاری پر راضی کیا۔ انہوں نے کہا کہ جنہیں جرمنی جاپان کی سرحد کا نہیں پتا انہیں اس دورے سے تکلیف ہوئی، مریم نواز کا یہ دورہ پنجاب اور پاکستان کیلئے اہم تھا۔ان کا کہنا تھا کہ پی ٹی آئی والے کارگرگی پر مقابلہ نہیں کر سکتے اس لیے گھٹیا باتیں ہی کرتے ہیں، وزیر اعلی 16، 16 گھنٹے کام کرتی ہیں۔ اس موقع پر صوبائی وزیر قانون صہیب احمد برتھ نے کہا کہ وزیراعلی پنجاب مریم نواز کا جاپان کا دورہ انتہائی کامیاب رہا، 30 سال بعد کسی پاکستانی رہنما نے جاپان کا دورہ کیا جہاں سرمایہ کاری، روڈ و اسپتالوں کے انفراسٹرکچر اور ایمرجنسی سہولتوں پر بات چیت ہوئی۔ان کا کہنا تھا کہ اس دورے سے صوبے میں سرمایہ کاری کے نئے دروازے کھلیں گے۔