جیل میں میری جان لینے کی کوشش کی جائے گی، چیئرمین پی ٹی آئی کا اہم پیغام

چیئرمین پاکستان تحریک انصاف (پی ٹی آئی)کا اپنے اہلخانہ کے ذریعے 24 اکتوبر کو قوم کے نام بھجوایا گیا پیغام سامنے آگیا۔نجی ٹی وی کے مطابق اپنے پیغام میں پی ٹی آئی چیئرمین نے کہا کہ گزشتہ چند روز کے دوران اپنی آنکھوں سے قانون کو ایک مذاق بنتے دیکھا، جو ہو رہا ہے وہ لندن منصوبے کا شاخسانہ نہیں بلکہ لندن معاہدے کا نتیجہ ہے، یہ ایک بزدل، بھگوڑے، کرپٹ مجرم اور اس کے سہولت کاروں کے درمیان طے پایا، جو کچھ ہم دیکھ رہے ہیں وہ ہمارے نظامِ انصاف کا مکمل انہدام اور تباہی ہے۔چیئرمین پی ٹی آئی نے کہا کہ میرے خلاف مقدمات مکمل طور پر جعلی، من گھڑت اور سیاسی اہداف کے تحت قائم کیے گئے ہیں، مقدمات اس لیے بنائے گئے تاکہ مجھے انتخابات کے بعد تک جیل میں رکھ سکیں، قوم میں بڑھتا شعور اور بند کمروں میں تیار کی جانے والی سازشوں کے خلاف مزاحمت انہیں خوفزدہ کرتی ہے۔انہوں نے کہا کہ فی الوقت جسمانی لحاظ سے میں ٹھیک ٹھاک ہوں، اگر میرے جسم پر کسی قسم کا ضعف یا کمزوری طاری ہوتی تو مجھے احساس ہوجاتا، یہ پہلے ہی دو مرتبہ میری جان لینے کی کوشش کر چکے ہیں۔چیئرمین پی ٹی آئی نے کہا کہ میں اپنا ملک چھوڑ کر جانے پر کبھی آمادہ نہیں ہوں گا، اس بات کا قوی امکان ہے یہ جیل میں میری جان لینے کی ایک اور کوشش کریں، یہ کوشش مجھے آہستہ آہستہ زہر دینے کی صورت میں بھی ہو سکتی ہے۔سابق وزیراعظم نے مزید کہا کہ ہماری جدوجہد اپنے فیصلہ کن مرحلے میں داخل ہو رہی ہے، آپ کو اپنے حقوق اور اپنے ملک کی آزادی کی لڑائی خود سے لڑنی پڑے گی، وکلا اور تنظیمی ذمہ داران کو ہدایات بھجوا دی ہیں ملک بھر میں کنونشنز منعقد کیے جائیں، جب بھی انتخابات کا موقع آئے اس کیلئے بھرپور انتخابی مہم چلائی جائے۔