بالی وڈ دبنگ اسٹار سلمان خان نے اعتراف کیا ہےکہ’ انہیں ابھی تک نہ سچا پیار ہوا اور نہ ان کا کوئی پیار ادھورا رہا ہے ‘۔
بگ باس کے 19 سیزن کا آغاز سلمان خان کی میزبانی میں ہوچکا ہے۔
بگ باس19 کے پریمیئر ایپی سوڈ میں شو کی کنٹیسٹنٹ تانیہ متل کی جانب سے سلمان خان سے سوال کیا گیا کہ ’ سر !کیا سچا پیار ہمیشہ ادھورا رہ جاتا ہے؟
اس پر سلمان خان نے جواب دیتے ہوئے کہا کہ’ سچا پیار؟ میں سچے پیار سے متعلق نہیں جانتا، کیوں کہ مجھے ابھی تک سچا پیار ہوا ہی نہیں، نہ مجھے کبھی سچا پیار ہوا نہ کبھی میرا پیار ادھورا رہا ہے‘۔
سلمان خان کے مداحوں میں ان کے اس بیان کو لے کر خاصی ہلچل مچی ہوئی ہے کیوں کہ ماضی میں سلمان خان کا نام ایک نہیں متعدد بالی وڈ اداکاراؤں کے ساتھ جوڑا جاچکا ہے۔
سلمان خان کے بالی وڈ اداکاراؤں سے افیئرز
بھارتی میڈیا رپورٹس کے مطابق ماضی میں سلمان خان اداکارہ سنگیتا بجلانی کے ساتھ لمبے عرصے تک تعلق میں رہ چکے ہیں، سنگیتا اور سلمان نے 1986 میں ڈیٹ کرنا شروع کیا تھا، 1994 میں دونوں نے شادی کرنے کا ارادہ کرلیا تھا اس حوالے سے سلمان خان نے خود بتایا تھا کہ ‘سنگیتا بجلانی’ کے ساتھ ان کی شادی کے کارڈز تک چھپ گئے تھے لیکن پھر شادی نہ ہوسکی‘۔
سلمان خان نے 1991 سے 1999 تک بالی وڈ اداکارہ سومی علی خان کو ڈیٹ کیا جس کے بعد فلم’ہم دل دے چکے صنم‘ کے سیٹ پر سلمان خان اور ایشوریا کے درمیان مراسم بڑھ گئے، ایشوریا اور سلمان کی دوستی بھی شادی تک جاپہنچی تھی لیکن 2001 میں اس جوڑی کے درمیان دراڑ آگئی۔
بتایا جاتا ہے کہ ماضی میں سلمان خان کترینہ کیف کو بھی 4 سال تک ڈیٹ کرچکے ہیں اس عرصے کے دوران دونوں کی شادی سے متعلق بھی خبریں سامنے آئی تھیں لیکن یہ تعلق بھی دیگر افیئرز کی طرح شادی تک پہنچے بغیر ختم ہوگیا۔
