پشاور(آئی این پی ) وزیراعظم شہبازشریف اور فیلڈمارشل عاصم منیر سیلاب زدہ علاقوں کے دورے پر روانہ ہوگئے ۔ وزیراعظم شہبازشریف اور فیلڈمارشل عاصم منیر سب سے پہلے سوات پہنچنے جہاں وفاقی وزیر امیرمقام نے دونوں کا استقبال کیا جبکہ وفاقی وزرا عطا تارڑ، امیر مقام اور احسن اقبال بھی وزیراعظم کے ہمراہ تھے ۔ حکام کے مطابق وزیراعظم اور فیلڈ مارشل سوات کے بعد بونیر روانہ ہوگئے جہاں انہوں نے بونیر،شانگلہ کے متاثرہ علاقوں میں سیلابی صورتحال،نقصانات کافضائی جائزہ لیا جبکہ وزیراعظم نے بونیر میں سیلاب متاثرین سے ملاقات اورامدادی چیک تقسیم کئے ۔دوسری جانب این ڈی ایم اے کی جانب سے خیبر پختونخوا کے سیلاب متاثرہ علاقوں کے لیے امدادی سامان کی ترسیل جاری ہے۔ این ڈی ایم اے کے مطابق بدھ کی صبح باجوڑ اور مانسہرہ کے لیے دو الگ الگ امدادی کھیپیں روانہ کی گئیں جن میں خیمے،کمبل، جنریٹر، ڈی واٹرنگ پمپس، راشن بیگز اور ادویات شامل ہیں۔ این ڈی ایم اے مطابق امدادی سامان سیلاب متاثرین میں تقسیم کے لیے متعلقہ ضلعی انتظامیہ کے حوالے کیا جارہا ہے ، این ڈی ایم اے، مسلح افواج اور فلاحی اداروں کے تعاون سے کے پی اورگلگت بلتستان کے لئے امدادی سامان روانہ کر رہا ہے۔
وزیراعظم اور فیلڈ مارشل کا سیلاب زدہ علاقوں کا دورہ ،امیرمقام نے استقبال کیا
