کراچی(آئی این پی )سندھ کے سینئر وزیر شرجیل میمن نے کہا ہے کہ کراچی میں بارش سے پیدا صورتحال سے نمٹنے کی تیاری کر رکھی تھی، کراچی میں بہت ہی کم وقت میں اتنی زیادہ بارش ہوئی، شہر میں کچھ جگہوں پر 145 ملی میٹر تک بارش ہوئی، شہر میں کافی مقامات سے پانی کی نکاسی کر دی گئی ہے۔ایک انٹرویو میں شرجیل میمن نے کہا کہ گزشتہ روز بارش کے دوران مختلف علاقوں میں حکومتی مشینری موجود تھی، کراچی کے متعدد علاقوں میں ڈی واٹرنگ اس وقت بھی جاری ہے، بہت سے لوگ سڑکوں پر گاڑیاں بند کر کے چلے گئے تھے، رات میں سڑکوں پر جو گاڑیاں خراب ہوئیں انہیں ہیوی مشینری سے نکالا۔انہوں نے بتایا کہ کراچی میں کچھ سڑکیں کے ایم سی کی، کچھ ڈی ایم سی اور کچھ ٹانز کی ہیں، کراچی میں بارش سے پیدا ایسی صورتحال سے نمٹنے کی تیاری کر رکھی تھی، ڈی سیز کو ہدایات ہیں کہ کام کریں اس بات سے قطع نظر علاقہ کس کا ہے۔ان کا کہنا تھا کہ دنیا کے کسی بھی شہر میں ایسی بارش ہو تو ایسی ہی مشکلات ہوتی ہیں، شارع فیصل سے بارش کے پانی کی نکاسی کر دی گئی ہے، کراچی میں آ ئندہ مزید بارش کی پیشگوئی ہے۔سینئر صوبائی وزیر کا مزید کہنا تھا کہ چاہتے ہیں عوام غیر ضروری طور پر نہ نکلیں، آج چھٹی دینے کا مقصد یہ ہے کہ شہری گھروں پر رہیں، جن کو بہت ہی ضروری کام ہو وہ آج گھروں سے نکلیں۔
کراچی میں بارش سے پیدا صورتحال سے نمٹنے کی تیاری کر رکھی تھی، شرجیل میمن
