شاہراہ قراقرم پر مسافر گاڑیاں چلانے پر پابندی

گلگت(پ ر)سکیورٹی خدشات کے پیشِ نظر تمام بڑی مسافر بردار گاڑیوں پر شاہراہِ قراقرم (کے کے ایچ)پر سفر کرنے پر غیر معینہ مدت کیلئے پابندی عائد کر دی گئی ہے۔ پولیس حکام نے اس بات کی تصدیق کی۔ضلع دیامر(گلگت بلتستان)اور اپر کوہستان(خیبر پختونخوا)کی ضلعی انتظامیہ کی جانب سے جاری کردہ ٹریول ایڈوائزری میں مسافروں کو ہدایت کی گئی ہے کہ وہ شاہراہِ قراقرم پر سفر سے گریز کریں اور متبادل راستے کے طور پر بابوسر روڈ استعمال کریں۔حکام کا کہنا ہے کہ یہ اقدام عوام کی حفاظت کے پیشِ نظر احتیاطی تدبیر کے طور پر اٹھایا گیا ہے۔ اگرچہ خطرات کی نوعیت کے بارے میں تفصیلات فراہم نہیں کی گئیں تاہم سکیورٹی ادارے صورتحال کو مسلسل مانیٹر کر رہے ہیں۔شاہراہِ قراقرم کے حساس مقامات پر سکیورٹی سخت کر دی گئی ہے جبکہ مسافروں، ٹرانسپورٹ کمپنیوں اور سیاحوں کو ہدایت کی گئی ہے کہ وہ سفر سے قبل راستوں کے بارے میں تازہ ترین معلومات حاصل کریں اور ضلعی انتظامیہ کی ہدایات پر عمل کریں۔