پی ٹی آئی نے ریاست مخالف پروپیگنڈے کیلئے سرکاری پیسہ استعمال کیا، عطا تارڑ

مسلم لیگ (ن)کے رہنما عطا تارڑ نے کہا ہے کہ پاکستان تحریک انصاف نے ریاست مخالف پروپیگنڈے کیلئے سرکاری پیسے کا استعمال کیا،میڈیا سے گفتگو میں ن لیگی رہنما عطا تارڑ نے کہا کہ خیبرپختونخوا میں تحریک انصاف کی حکومت نے سوشل میڈیا ٹرولرز بھرتی کیے، ہمارے پاس تفصیلات ہیں کہ کس سفاکانہ طریقے سے عوامی پیسے کو لوٹا گیا، 2019 میں خیبرپختونخوا حکومت نے سوشل میڈیا انفلوئنسرز کے طور پر 1100لوگ بھرتی کیے، ان کو بھرتی کرنے کا مقصد صحافیوں، سیاستدانوں کو گالیاں دینا تھا۔انہوں نے کہا کہ اس منصوبے پر کل 87کروڑ روپے خرچ ہونا تھے، معاملے پر سخت سے سخت کارروائی ہونی چاہیے، کیا یہ نوکریاں تحریک انصاف کی ملکیت تھیں؟، پارٹی کی تشہیر کیلئے پارٹی فنڈز سے پیسے جاری ہونا چاہیے تھے، غریب عوام کا 87کروڑ روپیہ خرچ کیا گیا، غریب سے دوائی، روٹی اور تعلیم کا حق چھینا گیا،عطا تارڑ کا کہنا تھا کہ سرکاری خزانے سے معاوضہ دے کر اداروں کے خلاف بیان بازی کی گئی، جن مجرمان نے ان 1100لوگوں کو بھرتی کیا ان کے خلاف کارروائی ہونی چاہیے، ایسے لوگوں کو کیفر کردار تک پہنچانا قومی فریضہ ہے، اس گھناﺅنے عمل پر کل ایک ارب سے زائد پیسہ خرچ کیا گیا۔