گلگت (پ ر) وزیر اعلیٰ گلگت بلتستان حاجی گلبر خان نے اپنے ایک بیان میں کہا کہ بھارت کی ہٹ دھرمی اس کیلئے مہنگی ثابت ہوگی ، بھارتی جارحیت کا منہ توڑ جواب دینے کیلئے پوری قوم متحد ہے ، ہمالیہ کے پہاڑوں سے لیکر کراچی کے ساحل تک ایک ایک فرد بھارتی ہٹ دھرمی کا سخت جواب دے گا ۔ وزیر اعلی گلگت بلتستان نے مزید کہا کہ بھارت میدانی، فضائی و ڈیجیٹل جنگوں سے بدترین شکست کھانے کے بعد اب آبی جارحیت کے اوچھے ہتھکنڈوں پر اتر آیا ہے اور پاکستانی قوم اس جارحیت کے خلاف سیسہ پلائی ہوئی دیوار بن کر کھڑی ہے اور خاص کر گلگت بلتستان تو شہدا کی سرزمین ہے ،یہاں کے لالک جان، کرنل راشد کریم شہید ،کرنل مجیب شہید اور میجر وہاب شہید جیسے سپوتوں نے سینے پر گولی کھا کر دشمن کا مقابلہ کیا ہے ، وزیر اعلی نے کہا کہ بھارت پاکستان کے حوالے سے کسی غلط فہمی میں نہ رہے ، آج کا پاکستان بھارت اور اسکے گٹھ جوڑ دشمن طاقتوں کو نیست و نابود کرنے کیلئے کافی ہے ۔
قوم متحد،بھارت کو ہٹ دھرمی مہنگی پڑے گی، وزیراعلیٰ
