وزیراعلیٰ نے اساتذہ کے مطالبات پر کمیٹی تشکیل دیدی،کنٹریکٹ ڈاکٹروں کو مستقل کرنے کا عندیہ

گلگت(پ ر)وزیر اعلیٰ گلگت بلتستان حاجی گلبر خان نے زیر صدارت ایجوکیشن سٹیئرنگ کمیٹی کا اجلاس منعقد ہوا۔ اس موقع پر وزیر اعلیٰ نے گفتگو کرتے ہوئے کہاکہ اساتذہ کرام کا پیشہ اور مقام مقدس ہے۔ اساتذہ کے جائز اور قانونی مطالبات پر سنجیدگی سے غور کیا جارہاہے۔ وزیر اعلیٰ نے اساتذہ کے مطالبات کا جائزہ لے کر سفارشات پیش کرنے کےلئے خصوصی اعلیٰ سطحی کمیٹی تشکیل دی ہے جس میں صوبائی وزیر قانون کی سربراہی میں صوبائی وزیر تعلیم، صوبائی وزیر خزانہ، صوبائی وزیر پلاننگ، ممبر گلگت بلتستان اسمبلی امجد حسین ایڈووکیٹ، ایڈیشنل چیف سیکریٹری، سیکریٹری سکول اینڈ کالجز، سیکریٹری خزانہ ، سیکریٹری سروسز ، اساتذہ کے نمائندوں میں سے ظفر خان،و سعید اللہ اور ٹیچر ریحانہ بتول شامل ہیں ۔ کمیٹی متعین کردہ ٹی او آرز کے مطابق آئندہ دو ہفتوں میں اپنی سفارشات تیار کرے گی۔ وزیر اعلیٰ نے اس موقع پر کہا کہ حقداروں کو ان کا جائز حق احتجاج سے پہلے ہی ملنا چاہئے۔ لوگوں کو اپنے جائز حقوق کےلئے احتجاج کرنے کی نوبت نہیں آنی چاہئے۔ دھرنوں کے بعد مسائل حل کرنے کے کلچر کو ختم کرنا ہوگا۔ گلگت بلتستان میں عوامی حکومت ہے اور ہماری حکومت کی ترجیح حقداروں کو ان کا حق دینا اور عوام کے مسائل ترجیحی بنیادوں پر حل کرنا ہے۔ اجلاس میں صوبائی وزیر سیکریٹری سروسزاینڈ جنرل ایڈمنسٹریشن اور صوبائی سیکریٹری سکول اینڈ کالجز نے اساتذہ کے مطالبات کے حوالے سے تفصیلی بریفنگ دی۔ بعدازیں وزیر اعلیٰ سے اساتذہ کے نمائندہ کمیٹی نے بھی ملاقات کرکے حکومت کی جانب سے سنجیدگی کا مظاہرہ کرنے اورقانون کے مطابق مسئلے پر غور کرنے پر وزیر اعلیٰ اور صوبائی حکومت کا شکریہ ادا کرتے ہوئے یقین دہانی کرائی کہ دھرنا ختم کیا جائے گا۔وزیر اعلیٰ کو صوبائی سیکریٹری سروسز اینڈ جنرل ایڈمنسٹریشن عثمان احمد کی سربراہی میں پبلک سکول اینڈ کالجز جوٹیال گلگت کے اساتذہ کی فلاح و بہبود اور سکول کو صوبائی حکومت کی تحویل میں لینے کے حوالے سے اپنی سفارشات پیش کیں، جس میں اساتذہ کی تنخواہوں کو دیگر سرکاری اساتذہ کے برابر کرنے کی سفارش کی۔ اساتذہ کی پنشن اور دیگر مراعات کے حوالے سے بھی تجاویز مرتب کی گئی ہیں۔ اجلاس میں پبلک سکول اینڈ کالجز کو صوبائی حکومت کی تحویل میں لینے اور گورننس کے موجودہ نظام کو برقرار رکھنے کی بھی سفارش کی گئی ہے۔وزیر اعلیٰ گلگت بلتستان حاجی گلبر خان نے ڈاکٹروں کی مستقلی کے حوالے سے منعقدہ اعلیٰ سطحی اجلاس کے موقع پر گفتگو کرتے ہوئے کہا کہ کنٹریکٹ پر خدمات سرانجام دینے والے ڈاکٹروں کو آخری مرتبہ ایکٹ کے ذریعے سے مستقل کرنا چاہتے ہیں جس کے بعد مستقبل میں ڈاکٹروں کو ایکٹ کے ذریعے سے مستقل کرنے کا دروازہ مکمل بند کیا جائے گا۔ آئندہ ڈاکٹرز کی بھرتیاں ایف پی ایس سی کے ذریعے ہی کی جائیں گی۔ صوبائی حکومت کنٹریکٹ پر ڈاکٹروں کی بھرتیوں کی بھی حوصلہ شکنی کرے گی۔ اس موقع پر صوبائی سیکریٹری صحت اور سیکریٹری سروسز اینڈ جنرل ایڈمنسٹریشن نے ڈاکٹروں کو مستقل کرنے کےلئے ایکٹ تیار کرنے کے حوالے سے وزیر اعلیٰ کو بریفنگ دی۔