گلگت(پ ر)وزیر اعلیٰ گلگت بلتستان حاجی گلبر خا ن نے مزدوروں کے عالمی دن کے حوالے سے اپنے خصوصی پیغام میں کہا ہے کہ اسلام سماجی انصاف کے اصولوں اور محنت کشوں کے حقوق کا درس دیتا ہے ۔ یکم مئی ان مزدوروں کی قربانیوں اور عزم کی یاد دلاتا ہے جنہوں نے اپنے بنیادی حقوق کو برقرار رکھنے اور کام کے منصفانہ ماحول کیلئے اپنی جانیں قربان کیں۔ آج کا دن محنت کشوں کی عظمت کی علامت ہونے کے ساتھ یہ موقع بھی فراہم کرتا ہے کہ اپنے محنت کشوں کے قومی تعمیر کیلئے انمول خدمات کا اعتراف کریں۔ نبی کریم ۖ کی کئی احادیث میں محنت کشوں کے حقوق، ان کو مناسب معاوضہ کی ادائیگی اور محنت کش طبقہ کے ساتھ منصفانہ سلوک کو یقینی بنانے کی تعلیم دی گئی ہے۔وزیر اعلیٰ نے کہا کہ ہم اس امر کو یقینی بنانے کیلئے پرعزم ہیں کہ اقتصادی ترقی کے ثمرات سے محنت کشوں سمیت آبادی کے تمام طبقات خوشحال ہوں۔حکومت گلگت بلتستان نے محنت کشوں کے حقوق کے تحفظ کیلئے سوشل پروٹیکشن پالیسی منظور کی ہے۔ محدود وسائل کے باوجود حکومت نے اپنے دیگر اخراجات کو کم کرکے مزدور کی کم از کم اجرت کو 37ہزار کیا اور تمام عارضی ملازمین کو اس کی ادائیگی یقینی بنائی۔ مستقبل میں بھی گلگت بلتستان میں محنت کشوں کے حقوق کا مکمل تحفظ یقینی بنانا حکومت کی اولین ترجیحات میں شامل ہے اور اس حوالے سے بھرپور اقدامات کررہے ہیں۔
محنت کشوں کے حقوق کاتحفظ حکومت کی ذمہ داری،گلبرخان
0
