پاکستان کرکٹ ٹیم کے سابق کپتان سرفراز احمد بھی کراچی میں بارش کے بعد معطل ہونے والی بجلی سے تنگ آگئے۔
کراچی میں منگل کی صبح سے وقفے وقفے سے ہونے والی بارش کے بعد شہر کے 550 فیڈر پر بجلی کی فراہمی معطل ہے۔
ترجمان کے الیکٹرک کا کہنا ہے کہ 2100 میں سے1550 سےزائد فیڈرز سےبجلی کی فراہمی جاری ہے۔
بجلی کی بندش کی وجہ سے پاکستان کرکٹ ٹیم کے سابق کپتان سرفراز احمد نے بھی پریشانی کا اظہار کرتے ہوئے حکام سے بجلی بحال کرنے کی اپیل کی۔
سرفراز احمد نے انسٹاگرام پر اسٹوری لگاتے ہوئے اپیل کی کہ بفر زون کی بجلی بحال کردو، 10 گھنٹے ہوگئے ہیں، UPS بھی بند ہوگیا ہے۔
دوسری جانب کراچی میں ایندھن کی سپلائی بندہونے سے بھی کے الیکٹرک کی گاڑیوں کی آمدورفت متاثر ہو رہی ہے۔
واضح رہے کہ کراچی میں موسلا دھار بارشوں کے بعد ہر طرف پانی ہی پانی ہے اور اربن فلڈنگ کی صورتحال ہے، کئی علاقوں میں گھروں میں پانی داخل ہوگیا جبکہ بارش کے دوران کرنٹ لگنے اور دیواریں گرنے سے 9 افراد جان سے گئے۔
آج شہر میں عام تعطیل کا اعلان کیا گیا ہے۔
