سپریم کورٹ ، بانی پی ٹی آئی عمران خان کی 9 مئی کے مقدمات میں ضمانتیں منظور

اسلام آباد (آئی این پی ) سپریم کورٹ آف پاکستان نے بانی پی ٹی آئی عمران خان کی 9 مئی کے 8 مقدمات میں ضمانتیں منظور کرلی۔چیف جسٹس یحیی آفریدی کی سربراہی میں تین رکنی بنچ نے بانی پی ٹی آئی کی 9 مئی مقدمات میں ضمانت کے کیس میں سماعت کی۔ جسٹس شفیع صدیقی اور جسٹس حسن اظہر رضوی بینچ میں شامل تھے۔سپیشل پراسیکیوٹر پنجاب ذوالفقار نقوی نے موقف اپنایا کہ گزشتہ روزعلالت کے باعث پیش نہ ہو سکا۔ جس پر چیف جسٹس یحیی آفریدی نے کہا کہ کوئی بات نہیں آج معاونت کریں، آپ سے عدالت کے دو سوالات ہیں، لاہور ہائیکورٹ کا فیصلہ آپ نے پڑھا ہوگا، کیا ضمانت کیس میں حتمی فائنڈنگ دی جا سکتی ہے، دوسرا سوال کہ سازش کے الزام پر اسی عدالت نے کچھ ملزمان کو ضمانت دی۔چیف جسٹس پاکستان یحیی آفریدی نے سپیشل پراسیکیوٹر پنجاب ذوالفقار نقوی سے استفسار کیا کہ کیا تسلسل کا اصول اس کیس پر اپلائی نہیں کرے گا ؟ جس پر سپیشل پراسیکیوٹر پنجاب نے جواب دیتے ہوئے کہا کہ ضمانت کیس میں عدالت کی آبزرویشن ہمیشہ عبوری نوعیت کی ہوتی ہے، عدالتی آبزرویشن کا ٹرائل پر کوئی فرق نہیں پڑتا۔سپریم کورٹ نے عمران خان کی 9 مئی کے 8 مقدمات میں ضمانتیں منظور کرلی مگر القادر ٹرسٹ کیس میں سزا ہونے کے باوجود فورا جیل سے باہر نہیں آسکیں گے۔ بانی پی ٹی آئی عمران خان نے اپنے خلاف راولپنڈی میں درج 43 مقدمات میں تاحال ضمانت حاصل نہیں کی جب کہ یہ تمام مقدمات ستمبر، اکتوبر اور نومبر احتجاج سے متعلق ہیں۔ بانی پی ٹی آئی کے راولپنڈی میں درج 9 مئی مقدمات میں ضمانتیں منظور ہو چکی ہیں، بانی پی ٹی آئی کے 9مئی مقدمات میں ضمانتوں کے مچلکے تاحال داخل نہیں کروائے گئے۔لاہور کے مقدمات میں ضمانت حاصل کرنے کے باوجود بانی پی ٹی آئی کی رہائی فی الحال ممکن نہیں ہے۔