پشاور(آئی این پی )مشیر اطلاعات خیبرپختونخوا بیرسٹر ڈاکٹر سیف نے کہا ہے کہ امن و امان کے قیام میں افغانستان کا کردار کلیدی ہے۔صوبائی مشیر اطلاعات بیرسٹر ڈاکٹر سیف نے افغان سفیر سردار احمد شکیب سے ملاقات کی جس میں باہمی دلچسپی کے امور پر تفصیلی تبادلہ خیال کیا گیا، خطے میں امن و استحکام کے لئے دونوں ممالک کے کردار پر بھی گفتگو ہوئی۔ملاقات کے دوران امن کے قیام کیلئے خیبر پختونخوا حکومت کے اقدامات پر تفصیلی گفتگو کی گئی، تجارت اور معیشت کی مضبوطی پر بھی تفصیلی بات چیت ہوئی۔بیرسٹر سیف نے کہا کہ وزیراعلی علی امین گنڈاپور کی قیادت میں صوبائی حکومت دہشت گردی کے خاتمے کیلئے سنجیدہ اقدامات کر رہی ہے، امن و امان کے قیام میں افغانستان کا کردار کلیدی ہے۔افغان سفیر سردار احمد شکیب کا کہنا تھا کہ طورخم بارڈر پر تجارتی سہولیات بڑھانے کی ضرورت ہے۔بیرسٹر سیف نے کہا کہ تجارت بڑھانے اور معیشت کی مضبوطی سے خطے میں امن اور خوشحالی کا فروغ ہوگا، عوام کی خوشحالی کیلئے معاشی اور تجارتی سرگرمیوں کی بحالی ناگزیر ہے، وزیر اعلی خیبر پختونخوا نے افغان عوام کی سہولت کیلئے کینسر ہسپتال کی تعمیر کا وعدہ کیا ہے۔صوبائی مشیر اطلاعات کا کہنا تھا کہ افغانستان کے سرحدی علاقوں میں سولر ٹیوب ویل فراہم کئے جائیں گے، خطے کی ترقی باہمی اعتماد اور تعاون سے ممکن ہے۔
امن و امان کے قیام میں افغانستان کا کردار کلیدی ہے، بیرسٹر سیف
