شکر ہے سرجری کے بعد اللہ تعالی نے دوبارہ پاﺅں پر کھڑا کردیا ‘ ارشد ندیم

لاہور(آئی این پی )اولمپک گولڈ میڈلسٹ ارشد ندیم نے کہا ہے کہ شکر ہے سرجری کے بعد اللہ تعالی نے دوبارہ پاں پر کھڑا کیا ہے۔ ارشد ندیم نے انگلینڈ میں سرجری کے بعد لاہور کے پنجاب اسٹیڈیم میں جیولین تھرو ٹریننگ کے سیشن میں حصہ لیا۔اس موقع پر میڈیا سے گفتگو میں اولمپک گولڈ میڈلسٹ نے کہا کہ انگلینڈ سے واپس آکر ٹریننگ کا آغاز کردیا ہے، میرا سارا فوکس ورلڈ ایتھلیٹکس چیمپئن شپ پر ہے۔انہوں نے کہا کہ ورلڈ اتھلیٹکس چیمپئن شپ میں میرا مقابلہ 17 اور 18 ستمبر کو ہوگا، دعا کریں اللہ تعالی مجھے فٹ رکھے اور امید ہے کہ انشا اللہ اچھا پرفارم کروں گا۔ارشد ندیم نے مزید کہا کہ انجری کھیل کا حصہ ہے یہ کھلاڑی کے ساتھ ساتھ چلتی ہے، شکر ہے کہ سرجری کے بعد اللہ تعالی نے دوبارہ پاﺅں پر کھڑا کیا ہے۔ان کا کہنا تھا کہ سن رہا ہوں کہ ارشد بالکل ہی ان فٹ ہے ایسی بات نہیں اللہ کا شکر ہے، میں فٹ ہوں، انجری کے بعد انسان کو تھوڑا سا دکھ ہوتا ہے لیکن انجری گیم کا حصہ ہے۔اولمپک گولڈ میڈلسٹ نے کہا کہ انجری کی وجہ سے مقابلوں میں حصہ نہ لینے کا دکھ ضرور ہے، دعا ہے کہ مجھے ورلڈ ایتھلیٹکس چیمپئن شپ میں عزت دے۔