وفاقی وزیر خزانہ سینیٹر محمد اورنگزیب نے کہا ہے کہ آئی ایم ایف بیل آﺅٹ پیکج کی تمام شرائط پوری کرنے کےلئے پر امید ہیں ، عالمی مالیاتی ادارہ (آئی ایم ایف)پاکستان سے ٹیکس بیس میں اضافے کا خواہاں ہے۔غیرملکی خبررساں ادارے کو دیئے گئے انٹرویو میں محمد اورنگزیب نے کہا کہ آئی ایم ایف بیل آﺅٹ پیکج کی تمام شرائط پوری کرنے کےلئے پر امید ہیں، گزشتہ 2 سال کے مقابلے میں پاکستانی معیشت میں استحکام آیا ہے۔انہوں نے کہا کہ انٹرنیشنل ریٹنگ ایجنسیوں نے پاکستان کی ریٹنگ اپ گریڈ کی ہے، جس میں مزید بہتری متوقع ہے، سنگل بی کیٹیگری ہدف ہے۔وفاقی وزیر خزانہ نے کہا کہ آئی ایم ایف پاکستان سے ٹیکس بیس میں اضافے کا خواہاں ہے، عالمی مالیاتی ادارے کا وفد آئندہ ماہ دورے پر آئے گا۔انہوںنے کہا کہ ٹیکس ٹو جی ڈی پی شرح 10 سے 10 اعشاریہ 3 فیصد تک لے جانے کا ہدف ہے، حکومت پاکستان اس ہدف کو پورا کرنے کےلئے پر عزم ہے۔محمد اورنگزیب نے کہا کہ یہ بینچ مارک حاصل ہونے سے مالی صورتحال مزید پائیدار ہوگی، اب ہمیں پائیدار معاشی گروتھ پر توجہ دینا ہوگی۔انہوں نے کہا کہ معیشت کا بنیادی ڈی این اے تبدیل کرنے پر توجہ مرکوز ہے، معاشی ترقی کو برآمدات کی بنیاد پر استوار کرنا چاہتے ہیں۔ وفاقی وزیر خزانہ نے کہا کہ چینی مارکیٹ میں پہلے پانڈا بانڈ کے اجرا کا پلان ہے، جس کے ذریعے 25 کروڑ ڈالر تک حاصل ہونے کےلئے پرامید ہیں۔انہوںنے کہا کہ یہ فنڈز اگلے 6 سے 9 ماہ میں ملنے کا امکان ہے، رواں مالی سال معاشی شرح نمو 3 اعشاریہ 5 فیصد تک جاسکتی ہے، پاکستان بین الاقوامی بانڈ مارکیٹ سے فنڈز حاصل کر سکے گا۔
