گلگت بلتستان اسمبلی نے فنانس بل 2022-23 کے سیکشن 21 (i) (D) کو حذف کرنے کی وزیر اطلاعات فتح اللہ خان کی کٹ موشن کی متفقہ طور پر منظوری دی ہے اور سرکاری افسران کو اخبارات ومیگزین خریدنے کے استحقاق کو بحال کردیا ہے۔ جمعران کے روز وزیر اطلاعات فتح اللہ خان نے ایوان میں کٹ موشن پیش کرتے ہوئے کہا کہ فنانس بل 2022-23 کے سیکشن 21 (i) (D) میں سرکاری اداروں کو اخبارات ومیگزین کی فراہمی پر پابندی عائد کی گئی ہے لہذا ایوان سے گزارش ہے کہ کٹوتی کی تحریک برائے پالیسی کو منظور کرتے ہوئے فنانس بل کے مذکورہ کلاز کو حذف کیا جائے تاکہ اخباری صنعت کو فروغ مل سکے۔ اس موقع پر انہوں نے کہاکہ چونکہ گلگت بلتستان میں الیکٹرانک میڈیا نہیں ہے، ڈیجیٹل میڈیا کی یہ صورتحال ہے کہ کبھی بجلی نہیں ہوتی تو کبھی موبائل کے سگنل نہیں ہوتے جبکہ اخبارات پر پابندی سے حکومت کو کوئی خاص بچت بھی نہیں ہوتی۔ دس لاکھ سالانہ بچت کےلئے دفاتر میں اخبارات کی پابندی مناسب نہیں ہے بلکہ یہ ایڈیشن بھی کردیں کہ گلگت بلتستان کے تمام سکولوں، کالجوں میں بھی اخبارات جانا چاہیے۔ ایوان نے اس تحریک کی متفقہ طور پر منظوری دی۔
